गडचिरोली : देशभरात गाजत असलेल्या ‘नीट’ (NEET) परीक्षा पेपरफुटी प्रकरणाची धग आता गडचिरोलीतही पोहोचली आहे. या गंभीर प्रकरणाची जबाबदारी स्वीकारून केंद्रीय शिक्षण मंत्री धर्मेंद्र प्रधान यांना पदावरून तातडीने बडतर्फ करावे, तसेच दिल्लीत उपोषणास बसलेले देशातील ज्येष्ठ शिक्षणतज्ज्ञ व पर्यावरणप्रेमी सोनम वांगचुक यांच्या आंदोलनाची सन्मानपूर्वक सांगता करावी, या प्रमुख मागण्यांसाठी आज गडचिरोलीत सर्वपक्षीय आणि विविध सामाजिक संघटनांच्या वतीने प्रचंड निदर्शने करण्यात आली. येथील मुख्य इंदिरा चौकात दुपारी झालेल्या या आंदोलनात आंदोलकांचा प्रचंड संताप पाहायला मिळाला.
धर्मेंद्र प्रधान यांच्या विरोधात जोरदार घोषणाबाजी
सर्वपक्षीय कार्यकर्त्यांनी इंदिरा चौकात एकत्र येत केंद्रीय शिक्षणमंत्री धर्मेंद्र प्रधान यांच्या विरोधात जोरदार घोषणाबाजी केली. केंद्र सरकार विद्यार्थ्यांच्या भविष्याशी खेळणाऱ्या या गंभीर प्रकरणाकडे जाणीवपूर्वक दुर्लक्ष करत असल्याचा आरोप यावेळी आंदोलकांनी केला. नवी दिल्ली येथील जंतर-मंतर मैदानावर सोनम वांगचुक यांचे उपोषण सुरू असून, त्यांच्या आंदोलनाला गडचिरोलीतील सर्व पक्ष आणि संघटनांनी एकमुखाने जाहीर पाठिंबा दिला आहे.
”येत्या २० जुलैच्या आत जर विद्यार्थ्यांना आणि सोनम वांगचुक यांच्या आंदोलनाला न्याय मिळाला नाही, तर हे आंदोलन अधिक तीव्र केले जाईल,” असा स्पष्ट इशारा आंदोलकांनी दिला आहे.
ठाणेदारांमार्फत राष्ट्रपतींना निवेदन
आंदोलनस्थळीच गडचिरोलीचे ठाणेदार विनोद चव्हाण यांना आंदोलकांच्या वतीने निवेदन सादर करण्यात आले. हे निवेदन भारताच्या राष्ट्रपतींच्या नावे लिहिलेले असून, त्यामध्ये नीट घोटाळ्याची चौकशी आणि सोनम वांगचुक यांच्या मागण्या तात्काळ मान्य करण्याची मागणी करण्यात आली आहे.
पावसातही नागरिकांची मोठी गर्दी
आज सकाळपासूनच गडचिरोलीमध्ये पावसाची संततधार सुरू होती. मात्र, तरीही पाऊस आणि चिखलाची पर्वा न करता आंदोलकांचा उत्साह कायम होता. शेकडो कार्यकर्ते, नागरिक आणि विशेषतः विद्यार्थी या आंदोलनात मोठ्या संख्येने सहभागी झाले होते. आंदोलनादरम्यान कोणताही अनुचित प्रकार घडू नये यासाठी पोलीस प्रशासनाच्या वतीने चोख बंदोबस्त ठेवण्यात आला होता.
आंदोलनात सहभागी प्रमुख नेते व मान्यवर
या सर्वपक्षीय आंदोलनात विविध राजकीय पक्ष व सामाजिक संघटनांचे प्रमुख पदाधिकारी उपस्थित होते. यामध्ये:
अखिल भारतीय रिपब्लिकन पक्ष: रोहिदास राऊत
भारतीय कम्युनिस्ट पक्ष: डॉ. महेश कोपुलवार, देवराव चवडे
BRSP: मिलिंद बांबोडे
रिपब्लिकन पक्ष: हंसराज उंदीरवाडे
संविधान फाउंडेशन: गौतम मेश्राम
आदिवासी संघटना: कुणाल कोवे (आदिवासी युवा परिषद), माधव गावड (आदिवासी एम्प्लॉयीस फेडरेशन), वसंतराव कुलसंगे (वीर बाबुराव समिती), आरती कोल्हे (आदिवासी महिला संघटना)
इतर संघटना व पदाधिकारी: प्रा. शेषराव येलेकर (ओबीसी महासंघ), विलास निंबोरकर (अंनिस), प्रा. देवानंद कामडी (सर्वोदय मंडळ), राजकुमार घोडेस्वार (कास्ट्राईब संघटना), सुरेश लाडके (मराठा सेवा संघ), हरिदास कोटरंगे (माळी समाज संघटना), प्रा. गौतम डांगे (ज्येष्ठ नागरिक संघ), अशोक राऊत (छात्र भारती), ज्येष्ठ कार्यकर्ते प्रा. अशोक लांजेकर, तुळशीदास सहारे, सोनू अलाम आणि रिपब्लिकन महिला आघाडीच्या नीता सहारे व सुनीता रायपुरे यांच्यासह शेकडो नागरिक उपस्थित होते.
